Ахмеджанов Алмасхан Тілеуханұлы 2019 жылдың желтоқсанында  Алматы қаласының қалалық жоспарлау және урбанистика басқармасының басшысы болып тағайындалды.

Жоғары білімі:  Абай атындағы Алматы Мемлекеттік университетін, М.Тынышбаев атындағы Қазақ көлік және коммуникациялар академиясын («Құрылысшы» мамандығы) тәмамдаған.

Мемлекеттік марапаттары: Қазақстан Республикасы Президентінің Жарлығымен «Құрмет» ордені, Қазақстан Республикасы Президентінің «Құрмет грамотасы» берілген.

«Астанаға 10 жыл», «Қазақстан Конституциясына 20 жыл» медальдарымен марапатталған.

Еңбек жолын 1996 жылы Қ.Сәтпаев атындағы Қазақ Ұлттық техникалық университетінде инженер болып бастап,  Алматы қаласы «Сәулет және қала құрылысы» басқармасы «Мемлекеттік сәулет-құрылыс бақылау» бөлімінің бас маманы лауазымына ауысты. Өзінің зеректігімен, жан-жақтылығының арқасында 25 жылдан астам уақыт қызмет етіп, бірнеше мемлекеттік қызметтер сатысына көтеріліп, мол тәжірибе жинақтады.

Қазақстан Республикасының заңнамасы шеңберінде сәулет және қала құрылысы, жер заңнамасы және рұқсат беру жүйесіндегі кедергілерді азайту нормативтік құқықтық актілерді әзірлеп, қабылдануына белсенді атсалысқан.

Жүзеге асуына қатысқан ірі жобалары:

• Алматы қаласының жерлерін нысаналы мақсатта пайдалану жіктемесін бекіту туралы (бұл жоба – Қазақстанда осындай мазмұндағы алғашқы құжат);
• Алматы қаласы бойынша құрылыс ережелерін әзірлеу және жетілдіру;
• Мекенжай және нөмірлеу ережелерін әзірлеу және одан әрі жетілдіру;
• Сандық форматқа көшірумен инженерлік желілер бойынша кезекшілік жоспарын әзірлеу;
• Қаланың Бас жоспарына түзетулер енгізу жобасы;
• Салынып жатқан объектілердің интерактивті картасын әзірлеу;
• Алматы қаласының аэрациясының интерактивті картасын әзірлеу;
• Мемлекет басшысы Қасым – Жомарт Тоқаевтың арнайы тапсырмасына сәйкес Алматы қаласы әкімінің міндеттеуі бойынша арнайы әзірленген «Қаланың сәулеттік келбетін қалыптастыру және қала құрылысын жоспарлау Ережелерін» қалалық Маслихаттың қарауында 2021 жылдың мамыр айында мақұлдады.

Қабылданған Ереже шаһар тұрғындары мен қонақтарына барынша жайлы әрі ыңғайлылық туындатады.